இந்த அர்ச்சனாவுக்கு முந்திய அர்ச்சனா

 

சென்ற விடுமுறைக்கு வந்திருந்த போதே
என்னிடம் அர்ச்சனா
விண்ணப்பம் செய்திருந்தாள்.
பக்கத்து வீட்டு ஷெர்லி அப்பா மாதிரி
நான் காதல் பறவைகளும்
புறாக்களும் வளர்க்க வேண்டும்.
அனந்த சங்கர் மாமா போல
தொட்டி மீனகள் அவசியம்.
புதுப் புது பூச்செடி எல்லாம்
பின் வீட்டு ஜோஸ் மாதிரி.
முடிந்தால் ஒரு சடைநாய்க் குட்டி
அவளே கொண்டுவந்துவிடுவாள்.
இந்த விடுமுறைக்கு வந்து
இரண்டு நாட்களாகியும்
எதையுமே கேட்கவில்லை இதுவரை.
வந்ததில் இருந்து
வரைந்துகொண்டே இருக்கிறாள்.
பதிவிறக்கம் செய்து தொடர்ந்து
பாடல்கள் கேட்கிறாள்.
கார்ட்டூன் அலைவரிசைகளில்
காணாமல் போய்விடுகிறாள்.
எனக்குப் பதற்றமாக இருக்கிறது.
வெறும் இரண்டு கோடைகளுக்கு இடையில்
எங்கே திசைமாறியிருக்கும் அவளுடைய
காதல் பறவைகளும் தொட்டி மீனகளும்
பூச் செடிகளும் என்று.
அவற்றை விடவும் தொலைந்து போனது
இந்த அர்ச்சனாவுக்கு முந்திய அர்ச்சனா என்பதை
எப்படிச் சொல்ல அவளிடம்?

………………………………………………………………………….கல்யாண்ஜி

எஸ் ஐ சுல்தான்