தரையில் விழுந்த பூ

கல்யாண்ஜி

வரவேற்பு வாசலில் எடுத்துக் கொள்ள

காம்புடன் ரோஜா பூ வைத்திருந்தார்கள்.

ஏற்கனவே அவை புத்தம் புதுப் பூ.

இவள் தேர்ந்துகொண்டதோ புதிதினும் புதிய பூ.

பேசிக்கொண்டே செருகினால் எப்படி?

சரியாய் அமராமல் கீழே விழுந்தது.

குனிந்து எடுத்துக் கொண்டு மறுபடி

சூடிக் கொண்டால் என்ன? இன்னொரு

பூவை எடுத்தாள், தலையில் வைத்தாள்.

போய்க்கொண்டிருந்தாள். தரையில் விழுந்த பூ

யார் குனிந்தெடுப்பார் என்ற யூகத்தில்

எல்லோர் முகத்தையும் பார்த்துச் சிரித்தது.

யார் நமை மிதிப்பார் என்ற கவலையும்

இல்லாமல் இல்லை. இருக்கும் தானே.

Advertisement